今日天朗氣清，心情好好，決定去奧海城無印良品旗艦店行下。
平日行街真好，周圍都無咩人，唔洗同人迫，就算行到肚餓搵野食，餐廳都任揀唔洗等位。不過係奧海城行左個圈，間間都係連鎖集團餐廳，見到覺得悶。
最後決定離開奧海土城，去附近橫街窄巷尋寶。行左5分鐘左右，係埃華街發現左呢間美式漢堡餐廳。
裝修佈置充滿美式風格，靠近牆邊有張長bar枱，雖然餐廳面積不大，而且用色偏黑灰，但唔會覺得侷促，感覺好舒服。
睇一睇，原來係開飯熱店，深水埗都有分店。望下餐牌，主要有漢堡、意粉，沙律同數款小食，估唔到漢堡都可以有咁多款式，對於有選擇困難既我，好大挑戰呀！
好彩店員好好，我比較麻煩，唔食生菜生蕃茄，最後係店員推介同幫忙下，成功選餐。服務態度一流，要讚！
和牛黃金海堡，食物係即叫即做，賣相唔錯，一黎就香氣撲鼻，想即刻一啖咬落去。上層係漢堡扒，中間果層係炸手打墨魚蝦膠，最底層係和牛，配埋軟熟既漢堡飽，層次非常豐富。
漢堡扒望落以為係一般超市雪藏貨，但入口就知係手打，好香肉味，又夠juicy，唔會好似雪藏漢堡扒咁實的的。
炸手打墨魚蝦膠，炸得金黃既外層，內裡係墨魚包住蝦膠，配埋蜂蜜芥辣醬，甜甜辣辣非常惹味，簡直係絕配，天作之合。
最矜貴既手打和牛，好香牛肉味，口感香滑，而且份量十足，性比價高，推薦！
跟餐叫埋薯條，大大條，好香薯仔味，而且有3款醬任揀任點，比麥當當好食多。另有蕃薯薯條選擇，夠晒新鮮特別，下次一定要再黎試下先。
水牛城燒烤雞翼，雞翼大大隻，漲卜卜，隻隻都好靚仔。炸得剛剛好，雞皮夠香夠脆，鎖住晒d肉汁，入面夠晒juicy，配埋秘製辣汁，夠晒開胃惹味。
