葵芳夢工場放題

放假两個人想搵下野食，唔知食乜好，唯有去食下放題啦，，乜都有得你食，5洗煩惱 !

LUNCH TIME $138既放題?去邊到搵?而家去翠華普通食個餐都閒閒地6-70蚊啦。
呢到138蚊算好多野食了，松葉蟹同生蠔仲要都係另加$78已有得你任食，計埋都係220蚊一位，果然係超級抵!抵!

平時放題都係得啤酒汽水任飲，估唔到仲會有清酒，梅酒比你飲，對於我呢啲喜愛杯中物既朋友泥講，真係幾有驚喜。

餐前小吃，芝麻八爪魚大大隻同辣味螺肉，一人份量，夠哂開胃。

wow…賣飛佛!
美國生蠔，新鮮大隻，酒店buffet都未必間間有得食到。
松葉蟹一樣係，鮮甜，味美。
刺身都有好幾種選擇:
立魚刺身，墨魚片刺身，鮑魚片刺身，鮮柱貝刺身，松葉蟹棒刺身，玉子刺身…
識食當然係主打勁食生蠔，松葉蟹同刺身啦～

平時去食放題好少食壽司，因為食完都飽，點食其他野呢？不過今次每款order一件泥試下，估唔到會咁好食。
首先細細件，唔會太飽，壽司應該即叫即做，上到枱啲飯仲暖暖地，而家師傅手勢都很好，飯唔會散。我自己就比較鍾意火炙三文魚壽司，火炙蟹棒壽司同吉烈蝦反卷，夠香口。

燒日本紫薯，我第一次食，細細粒好得意，內裡紫薯肉好甜，而且煙煙韌韌，連皮食埋幾過癮。
燒雞軟骨夠香口，佐酒一流。
燒雞肉串，雞肉夠哂滑。

燒牛舌，好香牛味，燒完亦唔會太乾身同韌。
燒羊架，肉質鬆軟，我鍾意佢羊羶味夠重。

 

食埋甜品至夠完美。

 

元朗拉麵天王

行過見到好多人排隊，跟住你排我又排，排埋一份，簡簡單單既裝修，地方明亮潔淨。

小小既拉麵店，款式雖然不太多，但貴精不貴多，3款主打"天王"麵加"限定天王"2款麵，而且"限定天王"更是由天王師傅配合不同天氣季節，選擇最適合既材料當做食材，充滿新鮮感，夠哂特色。

麵底要軟要硬定要普通，任你選擇
湯底普通定淡，任你選擇
另外一般都會要埋义燒，好少客人會唔要嘅

今次有幸試到限定天王既櫻花蝦拉麵$89，賣相十分別緻，拉麵上面放滿大量櫻花蝦，好似一幅畫咁，很漂亮。湯底濃郁，食落有非常重既蝦皮味，麵底彈牙，义燒肥瘦適中。

另外加多個赤天王$78，紅色既湯底滲出淡淡既辣香味，食落是屬於少辣果一種，义燒索左湯汁後更是香口。

烤餃子$28，皮唔會太厚，炸到好香脆，菜肉各半，一啖一口。

豚角煮$25，配上自制醬汁，感覺就是日式五花腩,夠肥美。

 

 

 

 

 

 

 

 

 

 

山林道井橋日本料理

朋友仔介紹下走左去山林道搵好野食,門口望入去店面乾淨企理,店員親切友善,感覺就好似睇日劇D人辛苦工作完,放工三五知己聚腳晚飯既地方,旁邊有好幾張枱應該係常來既客人,聽住佢地同店員講下笑話咁,自己都忍唔住笑埋一份,感到好輕鬆舒服同好有歸屬感

如果两個人泥食,呢個刺身拼盤$488，就啱哂我地,乜都有d,可以樣樣食齊,而且件件都成吋厚,又厚又大件,每款两件,飛機魚同海膽成份上

  

大池魚夠爽口新鮮

珍寶帆立貝大大舊,一啖食哂佢, 充滿口感

牡丹蝦夠哂大隻,鮮甜美味

拖羅更是我最愛刺身之一,入口即溶,油香味盤旋口中久久不散

另外再加多左两份活赤貝$96,好鮮好正呀,必食推介!!

軟殼蟹牛油反卷$88,牛油果好滑,配埋軟殼蟹口感外軟內脆

燒煙肉卷蠔串$38,蠔唔會燒完韌,剛剛好

鹽燒牛舌$32,爽口入味

燒雞軟骨棒$18, 肉汁夠juice

燒鰻魚$98 ,夠哂大份,配埋個鰻魚汁味道一流

香草羊架$78,香口野味,芥辣同薄荷汁都是師傅自家調配

甜品推介,日本運到,南瓜雪糕,大大個,好滑好香南瓜味

桔子雪芭,酸甜醒胃,份外醒神

又是愉快的一晚........

 

 

 

十點後 更設有宵夜時段,多款特價串燒佐酒一流

 

巨型厚切大壽司-元朗田中

以前未搬入元朗都有專登揸車泥食，而家搬左元朗住更加係常客，泥之前記得要留肚，同要早點泥等位，時間關係，喺門口等位時已可拎定張點餐紙寫定要食乜，一入座就可落order，由於餐廳太多人等位，所以是有時間限制架。
牆上面都有好多相比你選擇食乜，細心去睇樣樣都好吸引，直頭想全部都點哂！
如果有朋友陪同一齊食就可叫多幾款食物。

有時一個人泥，多數會叫呢個壽司拼盤，件件都又厚又超大件，而且非常新鮮，相信呢個份量都足夠你填滿肚子

稻香晚飯

一講起稻香晚飯就會諗起1蚊雞任叫，呢個推廣真係好抵食好成功
喺現場見到啲食客真係好瘋狂，有啲6個人去，叫6隻雞，一人一隻一蚊雞一碗飯連埋茶芥加一，埋單每位唔洗30蚊。佩服佩服
自問我就無呢個本事可以自己食一隻雞。
今晚同屋企人近近地落左樓下稻香食頭盤飲左佢個菜膽雞燉翅，幾清，係魚翅少量左啲，要認真搵先見到不過33蚊呢個價錢，份量差5多啦。
由於係星期日既關係，無一蚊雞食，唯有叫其他雞啦。試左佢個麵醬雞，78蚊都抵食，食落都幾野味，唔會太濃味，整完隻雞都幾滑，撈飯一流。

跟住叫左個上湯龍蝦伊麵孖寶，龍蝦都幾新鮮同都幾夠大隻，個伊麵底吸左啲上湯汁，好淋好好味。
個set另外款菜叫左個甜豆抄桂花蚌，估唔到啲桂花蚌都幾大件，有成隻手指咁長，同都有好多件，平時唔喜歡食豆類既我，試左佢啲抄甜豆，出奇地啱我口味，好鮮嫩爽口。

再泥叫左個廣島蠔煲，呢個就真係有點失望啦，炸粉太厚，蠔又細隻。

最後當然要食埋甜品先走啦，由於制作需時，我地一開始已order定呢個椰汁蛋白燉燕窩，好在都無令人失望，好香好滑。不過如果細食既朋友就最好2個人share一份，因為都幾大份，一個人食哂都會有啲溜。

 

 

 

 

 

 

紅磡彩褔皇宴

今日爸爸生日飯，為左方便大家回家選擇左紅磡火車站附近呢間酒樓，環境感覺都幾乾淨企理，叫左一圍餸，食落都幾驚喜。

招牌雞煲鮑翅
足8両，魚翅夠哂多，係味精重手左，飲頭幾啖已感到口乾。

脆皮黃金雞

呢個真係好驚喜，皮脆肉嫩，忍不住食左好多件，平時去飲宴食得多，咁好食都係第一次。

大蝦非常新鮮彈牙，仲好有蝦味。

油泡大蝦球

客家炆豬肉
呢道菜聽說攞獎的，的確好有水準，豬腩肉入口即溶，酸菜令人醒神開胃，我地即時每人泥個靚仔撈哂佢啲汁，都唔洗5分鐘，道菜清到見底，汁都無哂，太厲害啦！

滑蛋抄蟹肉珍珠帶子
蛋抄得夠哂滑，蟹肉同帶子都夠哂嫩。

清蒸沙巴龍躉斑
時間剛剛好，魚肉剛好離骨，魚肉肉質鮮嫩彈牙。

牛肉嫩而不夠，而且夠哂牛肉味。

薑蔥爆牛肉

好耐無食過炸功咁好既炸魚腩啦，即叫即炸，火喉十足，炸粉唔會太厚，而且魚肉非常新鮮。

啫啫生炆頭腩煲

竹笙頂湖上素
豆腐夠哂滑，先前食得太多肉，呢碟夠哂清，搵番小小味覺。

最後生日飯當然要有大壽包，個蛋黃蓮蓉壽包真係好大件，好好味。